දෙසැම්බර් 5 ද මැයි 12 ද?

ඇමරිකාවෙ ඉඳන් ලංකාවට එද්දි මගෙ ගමන් බලපත්‍රයෙ කල් ඉකුත්වීමේ දිනය නිසා වෙන්න ගිය ඇබැද්දියක් තිබුනා කියලා කලින් කිව්වනෙ. ඒක අනුරාධ රත්නවීරසිද්ද වෙන්න ගියා වගේ වලංගු කාලය දිගු කළ පිටුව නොබලා කල් ඉකුත් වෙලා කියලා කිව්ව සිද්ධියක් නම් නෙවෙයි.

මගෙ ගමන් බලපත්‍රය කල් ඉකුත් වෙන්න තිබුනෙ 2010 දෙසැම්බර් 5. ගුවන්තොටුපොලට ගියාම එතැන නිලධාරීන් ගමන් බලපත්‍රය අරන් පරීක්ෂා කරල බලනවනෙ. මගෙ ගමන් බලපත්‍රය අරන් පරීක්ෂා කරපු නිලධාරියා කිව්වා ‘මේකෙ කල් ඉකුත්වෙලා (අවලංගුයි)’ කියලා. (සිංහලෙන් නෙවෙයි කිව්වෙ.) එහෙම කියලා ඔහු ඉහල නිලධාරිණියවත් එතැනට ගෙන්න ගත්තා.

ඔහු එහෙම කියන්න හේතුව තමා ගමන් බලපත්‍රයෙ අවලංගු වෙන දිනය විදියට සඳහන් වෙලා තිබ්බෙ 05/12/2010 කියල නිසා. ඇමරිකාවෙ දිනය ලියන්නෙ ලංකාවෙ ලියනවා වගේ දිනය/මාසය/අවුරුද්ද පිලිවෙලට නෙවෙයි, මාසය/දිනය/අවුරුද්ද පිලිවෙලට නිසයි. ඒ නිලධාරියා මගෙ ගමන් බලපත්‍රයෙ කල් ඉකුත් වෙන දිනය විදියට තේරුම් අරන් තිබුනෙ දෙසැම්බර් 5 නෙවෙයි, මැයි 12 කියලයි. (මම ආවෙ ජුනි මාසෙනෙ.)

මම ඕක තේරුම් කරන්න උත්සාහ ගනිද්දි තවත් නිලධාරියෙක් ‘අපිට මාස හයක් වෙනකම් කල් ඉකුත් වුන සිද්ධි හසුරවන්න පුළුවන් නේද?’ කියලා අහගෙන එතැනට ආවා. දැන් නිලධාරියො ගොඩයි. ලොකු නිලධාරිණිය ‘නෑ නෑ.. මෙයා කියනවනෙ මේ ලියල තියෙන්නෙ මැයි 12 නෙවෙයි දෙසැම්බර් 5 කියලා’ කියල ගමන් බලපත්‍රය අතට අරන් හොඳින් බලන්න ගත්තා (කොහෙ හරි මේ දිනය ලියල තියන පිළිවෙල dd/mm/yyyy කියල සඳනන්ව තියනවද කියල වෙන්න ඇති.)

දිනේ ලියල තියන පිළිවෙල ගැන සඳහනක් නැති වුනත්, හොඳ වෙලාවට ඒ නිලධාරිණියම හොයාගත්තා මගෙ උපන් දිනය වන 18 වෙනිදා ලියල තියෙන්නෙත් දවස මුලින් කියලා. මුලින් 18 තියනකොට ඒක මාසෙ වෙන්න බැරි බව ඇයට වැටහුන නිසා ප්‍රශ්නෙ විසඳුනා. ඊට පස්සෙ මගෙ ගමන් බලපත්‍රය එතැන හිටපු හැම නිලධාරියටම පෙන්නලා තේරුම් කරල දෙන්නත් ඇය අමතක කළෙ නෑ.

හොඳ වෙලාවට මගෙ උපන් දිනේ 12 වෙනිදායින් පස්සෙ දවසක් වුන නිසා වැඩේ ගොඩ ගියා. මාසෙ මුල දවසක් වුනානම් ඒත් අමාරුවෙ වැටෙනවා.

ලෝකෙ විවිධ රටවල දිනය ලියල පිළිවෙල වෙනස් බව අපේ රටේ ආගමන-විගමන දෙපාර්තමේන්තුවේ නිලධාරීන් නොදන්නවද මන්දා. (ඔවුන්ගෙ හොඳ වගේම වැරදිත් පෙන්නලා දෙන්න ඕනෙනෙ.) ගමන් බලපත්‍රයේ දින සටහන් කරද්දි ලියන පිළිවෙල dd/mm/yyyy කියලා එතැනම සටහනක් කළානම් හෝ දිනය 12 December 2010 වගේ මාසය අකුරෙන් සටහන් කළානම් හෝ කිසි ගැටළුවක් වෙන්නෙ නෑ.

ගමන් බලපත්‍ර නිර්මාණයේදී මේ කාරණයත් සැලකිල්ලට ගන්නවානම් මට වගේ ඇබැද්දි වලට ලක් වෙන්න වෙන කාටවත් සිදු වෙන එකක් නෑ.

Advertisements

අලුත්ද? අළුත්ද?

අවුරුද්දට සුභපැතුම් ලියන සමහර අය “සුභ අලුත් අවුරුද්දක් වේවා” කියල ලියන අතරෙ සමහරු “සුභ අළුත් අවුරුද්දක් වේවා” කියල ලියනවා. මේ දෙකෙන් මොකක්ද හරි එක? අලුත්ද- අළුත්ද?

මම දන්න විදියට නම් නව කියන අදහස එන්නෙ අලුත් කියන වචනෙන්. අළුත් වචනෙ අළු කියන්නෙ ‘මිනී අළු‘ කියන තැන කියවෙන අළු ගැනයි. “සුභ අළුත් අවුරුද්දක් වේවා” කිව්වහම ඒකෙ තේරුමක් නැති වෙනවා,  හරි සිංහල භාෂාවෙන් හිතනවා නම්. ඒත් ඉතින් කියන්නා කෙසේ කීවත් අසන්නා සිහිබුද්ධීයෙන් අහන නිසා සන්නිවේදනයෙදි ගැටළුවක් වෙන්නෙ නෑ.

ඒ නිසා මේ ලබපු අවුරුද්දෙවත් අපි හරි සිංහල පාවිච්චි කරන්න උත්සාහ ගනිමු.

එසේම වේවා

ඉස්සර ඉස්කෝලෙදි අලුත් අවුරුදු නිවාඩුව ඉවර වෙලා ආවහම සමහරු “සුභ අලුත් අවුරුද්දක් වේවා” කියලා කටපුරා සුභ පතනවා. ඒ අතරෙ තවත් කට්ටියක් සුභපතන්නෙ “එසේම වේවා” කියලයි. ඒක පස්සෙ පස්සෙ හැමෝම වගේ කරන්න ගත්තා. ඒ පුරුද්දට මමත් ඒ කාලෙ ඉඳලම අලුත් අවුරුද්දට යාළුවන්ට සුභ පතන්නෙ “එසේම වේවා” කියලයි.

“එසේම වේවා” කියල මුලින්ම කියන එකෙත් සමහරවිට වාසියක් තියෙනවා. වචනයෙන් “සුභ අලුත් අවුරුද්දක් වේවා” කියල සුභ පැතුවට හිත යටින් වෙන වෙන දේවල් හිතන අයත් නැතිව නෙවෙයිනෙ. අන්න ඒ අයට එසේම වේවා කියල මුලින්ම කිව්වහම හරි. මමනම් එසේම වේවා කියන්නෙ ඒ විදියෙ අය ගැන හිතල නෙවෙයි,  නිකං ආතල් එකටයි.

ඉතිං, හැමදෙනාටම එසේම වේවා එහෙනම්!

ඉර වටේ තවත් රවුමක්

හැමදාමත් ඉර වටේ අපේ ලෝකෙ කරකැවුන වගේ අදත් ඒ ගමන යනවා. හෙටත් එහෙම යයි. ඒත් ඉතින් හෙට අවුරුදුනෙ. හෙටින් පටන් අරගෙන ඉර වටේ තවත් රවුමක් යන්න ලෑස්ති වෙන්න සූදානම් වෙන අය බොහොමයි.

ලෝකෙ ඉර වටේ ගිය අන්තිම රවුමෙදි මොනතරම් දේවල් සිද්ධ උනාද? අපේ රටටම මොන තරම් දේවල් උනාද? අර මිනීමරු කොටින්ව පරද්දපු එක (ඒත් තාම දෙමළ ජාතිවාදය එහෙමමයි); රටේ මහතැනට පත්වෙන්න වීරයො දෙපලක් හැප්පුන හැටි; දියවන්නාවෙ කයි-කථා ශාලාවට එන්න දාස් ගාණක් කට්ටිය සල්ලි මිටි පිටින් වියදම් කරපු එක; මේ ටිකක් විතරයි. අපිට පුද්ගලිකව මොනතරම් දේවල් උනාද? ඊලඟ රවුම යනකොටත් ඉතින් තවත් මොනතරම් දේවල් සිද්ධ වෙයිද?

ගිය පාර නම් පිටරට ඉන්න අපිටත් නැකැතට කන වැඩේ හරි කරන්න පුළුවන් උනා. ඒත් මේ පාර කන්න තියෙන්නෙ මෙහෙ වෙලාවෙන් රෑ දෙගොඩහරියටනෙ. ඉතින් නැකතට වැඩ කරන්න වෙන්නෙ නෑ. (කොහොමත් ලංකාවෙදිත් කෑම කන නැකත ඇරෙන්න අනිත් ඒවා මායිම් කරන්නෙ නෑ නොවැ.) ඒ මදිවට සිංහල අවුරුද්ද කියලා අපිට නිවාඩු ලැබෙන එකක්යැ.

හැමෝටම සුභ අලුත් අවුරුද්දක් වේවා කියල සුභපතනවා! ප්‍රාර්ථනා කළාටම ඉතින් හැමදේම සුභ විදියට වෙන්නෙ නෑනෙ. ඒ ලෝක ස්වභාවය. හොඳක්ම වෙයි කියල බලාපොරොත්තු වෙලා, නරකම දේටත් මුහුණදෙන්න ලෑස්තිවෙලා ඉර වටේ යන ඊලඟ රවුම යන්න පටන් ගන්න එහෙනම්!

පින්තූරෙ ගත්තෙ මෙතනින්.